मकवानपुर । बागमती प्रदेश सभा सदस्य सुस्पा भुजेलले प्रधानमन्त्री बालेन्द्र शाहले मार्ग प्रशस्त गर्नुपर्ने बताएकी छिन्। उनले सीमा विवादबारे आइतबार बसेको प्रतिनिधिसभा बैठकमा दिएको अभिव्यक्ति राष्ट्रहित विपरीत भएको भन्दै मार्ग प्रशस्त गर्न सुझाव दिएकी हुन्।

सोमबार बसेको प्रदेश सभाको बैठकमा प्रदेश सरकारको आगामी आर्थिक वर्षको नीति तथा कार्यक्रममाथिको छलफलमा भाग लिँदै सांसद भुजेलले प्रधानमन्त्री शाहले नेपालले पनि भारतको सीमा मिचेको भनाइले नेपाली जनताको स्वाभिमानमा गहिरो चोट पुर्‍याएको बताइन्।

प्रधानमन्त्रीले संसद् र सिङ्गो देशलाई आफ्नो अभिव्यक्तिको लिखित जवाफ दिनुपर्ने माग गर्दै पद त्याग्नु पर्ने उनको भनाइ छ।

‘प्रधानमन्त्री ज्यू, तपाईँ गीत गाएर आउनुभयो, हामी इतिहास बनाएर आयौँ। तपाईँ सङ्गीतको मीठो धुन सुनेर आउनुभयो, हामी न्यायका लागि बम, बारुद र बन्दुकका आवाज सुनेर आयौँ,’ उनले भनिन् ।

सांसद भुजेलले प्रदेश सरकारको नीति तथा कार्यक्रमलाई अझ प्रभावकारी बनाउन विभिन्न प्रस्ताव र सुझावहरू समेत पेस गरिन् । उनले सरकारका नीतिहरू केवल कागजमा मात्र सीमित नभई जनताको भावनासँग जोडिनुपर्नेमा जोड दिइन् ।

कुनै पनि प्रदेशवासी बेरोजगार बस्न नपर्ने, उपचारको अभावमा मृत्युवरण गर्न नपर्ने र कोही पनि शिक्षाको अधिकारबाट वञ्चित हुन नपर्ने कुरालाई समृद्ध बागमतीको मुख्य लक्ष्य बनाउनुपर्नेमा उनले जोड दिइन् ।

उनका अनुसार मुख्यमन्त्री कार्यालयले नै बजेट विनियोजन गर्ने र आफैँले अनुगमन गर्ने परिपाटी प्रभावकारी छैन । सम्बन्धित मन्त्रालयका विषयगत समितिहरूलाई दक्ष र सक्रिय बनाएर अनुगमनको जिम्मा दिनुपर्ने उनको भनाइ छ।