संसद्लाई छलेर अध्यादेश ल्याउनु व्यवस्था माथिकै हमला : महासचिव गुरुङ

हेटौँडा । नेकपा माओवादी केन्द्रका महासचिव देवप्रसाद गुरुङले सरकारले संसद्लाई छलेर अध्यादेश ल्याउनु व्यवस्था माथि कै हमला भएको बताएका छन् । सरकारले संसद्लाई कमजोर र विस्थापित बनाउन खोजेको समेत उनले आरोप लगाए ।
प्रेस सेन्टर नेपाल मकवानपुरले शनिवार हेटौँडामा आयोजना गरेको पत्रकार भेटघाट कार्यक्रमलाई सम्बोधन गर्दै महासचिव गुरुङले सरकारले ३१ वटा कानुनलाई अध्यादेश मार्फत संशोधन गर्नुले सरकारको नियत नै गलत भएको बताए ।
महासचिव गुरुङले विगतमा प्रचण्ड नेतृत्वको सरकारले थालेको भ्रष्टाचार विरोधी अभियानलाई केपी शर्मा ओली नेतृत्वले सरकारले रातारात उल्टाउने काम गरेको बताए ।
‘उनले भने, ‘देशको लोकतन्त्र र राष्ट्रियतामाथि खतरा पैदा भएको छ । सरकारको सोच र चिन्तनको कारण मुलुक गम्भीर सङ्कटमा फस्दै गएको छ । अन्तर्राष्ट्रिय राजनीतिमा देखिएको फेरबदलले नेपालको स्वाधीनताको रक्षा गर्न चुनौतीपूर्ण देखिएको छ । मुलुकको स्वाधीनताको रक्षा गर्न अङ्गीकार गर्नुपर्ने परराष्ट्र नीति समेत सरकारले अङ्गीकार गर्न सकेको छैन ।’
सुशासनको नाममा सरकारले भ्रष्टाचारी र कमिसनतन्त्रलाई प्रशय दिने काम गरेको उनले बताए ।
प्रतिक्रिया दिनुहोस्: