Swornakshar Logo

नेपाली नागरिकता लिन खोज्ने ३ भारतीय पक्राउ

काठमाडौं । नेपाली नागरिकता लिन झुटो विवरण पेश गरेको आरोपमा तीन जना भारतीय नागरिकलाई प्रहरीले पक्राउ गरेको छ ।

पक्राउ पर्नेहरुमा भारत घर भई काठमाडौं बस्दै आएका ५१ वर्षीय हरियोम गुप्ता भनिने हरिओम कुमार, २० वर्षीय ऋषि गुप्ता र १८ वर्षीय हर्ष गुप्ता छन् । उनीहरुलाई जिल्ला प्रहरी परिसर काठमाडौंको टोलीले पक्राउ गरेको हो । पक्राउ परेका तीन जना बाबुछोराहरु हुन् ।

उनीहरुले झुटा विवरण पेश गरेर वंशजको नेपाली नागरिकता लिने खाजेको काठमाडौं प्रहरी परिसरका एसपी तथा प्रवक्ता नवराज अधिकारीले बताए ।

२९ जेठमा हर्ष र ऋषिले आफूसँगै व्यापार गर्दै आएका बाबु हरिओम वेपत्ता भएको झुटो विवरण बनाउँदै भारतीय नागरिक रहेको तथ्यलाई लुकाएर वडाबाट सर्जिन मुचुल्का समेत बनाएर नेपाली वंशजको नागरिकता लिन फारम भरेको प्रहरीले जनाएको छ ।

वंंशजको नागरिकताका लागि अनसूची १ को फारम समेत भरेर पेश गरेको अवस्थामा उनीहरुलाई पक्राउ गरिएको एसपी अधिकारीले बताए । पक्राउ परेका तीनै जनाविरुद्ध नागरिकता सम्बन्धी ऐनको कसुरमा ५ दिनको म्याद लिएर अनुसन्धान अघि बढाइएको छ ।