Swornakshar Logo

स्थायी समिति बैठक फुटको प्लेटफर्म बन्न सक्छःप्रचण्ड

काठमाडौं । १८ असार । सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले पार्टी फुटको प्लेटफर्म जारी स्थायी कमिटी बैठक बन्न सक्ने बताएका छन्।

बिहान थोरै समय चलेको स्थायी कमिटीको बैठक सरकारले संसद अधिवेशन अन्त्य गर्ने निर्णय गरेपछि स्थिगित भएको थियो । दिन भरी स्थिगित रहेको बैठक साँझ केहि समयकालागि सुरु भएपछि प्रचण्डले पार्टी एकता गम्भीर संकटमा परेको बताएका थिए।
त्यसपछि बैठक केहीबेरका लागि स्थगित गरेर प्रचण्डले प्रधानमन्त्री एवम् पार्टी अध्यक्ष केपीशर्मा ओलीसँग छलफल गरेका थिए। प्रधानमन्त्री ओलीसँग छलफल गरेलगत्तै प्रचण्ड राष्ट्रपतिलाई भेट्न शितल निवास पुगेका थिए।

राष्ट्रपतिलाई भेटेर आएपछि फेरि बैठक सुरु भएको थियो। बैठकमा प्रचण्डले केहीबेर आफ्ना धारणा राखेका थिए।

‘पार्टी एकता गम्भीर संकटमा पर्यो। यो स्थायी समितिले पार्टी एकता पनि घोषणा गर्न सक्छ। यही स्थायी समिति पार्टी फुटको प्लेटफर्म पनि हुन सक्छ।’ प्रचण्डको भनाई उदृत गर्दै एक नेताले भने, ‘हामीले पार्टी एकतालाई जोगाइराख्न सक्दो प्रयास गर्नुपर्छ, पार्टी एकता जोगाइराख्न पर्छ। अब जे पनि निर्णय हुनसक्छ त्यसका लागि तयार भएर बसौँ।’

यसअघि असार १० गते स्थायी समिति बैठकको सुरुआतको दिन प्रचण्डले पार्टी विभाजनको संघारमा पुगेको बताएका थिए।

‘पार्टी विभाजन भएमा पूर्व एमाले एकातिर, पूर्व माओवादी अर्कोतिर हुने स्थिति आउँदैन’ प्रचण्डको भनाई उदृत गर्दै एक नेताले भने ‘पूर्व एमाले र पूर्व माओवादी मिसिएर पार्टी विभाजन हुन सक्छ, तर हामी त्यो दिशामा जानु हुँदैन।’

प्रधानमन्त्री ओलीले दल विभाजनका लागि खुकुलो बनाउने ऐन समेत ल्याउन सक्ने खतरा रहेको प्रचण्डले बताएका थिए।

‘मैले प्रधानमन्त्रीलाई अध्यादेश ल्याउँदै हुनुहुन्छ भनेर सोधेको थिएँ। उहाँले २–३ दिन ल्याउँदिन भनेर भन्नुभयो, यसको मतलव उहाँले ल्याउने खतरा छ’ प्रचण्डको भनाई उदृत गर्दै अर्का नेताले भने, ‘मैले यही भएर राष्ट्रपतिलाई यस्तो अध्यादेश ल्याउनुभयो भने केही दिन रोक्नुस है भनेर भनेको हो, उहाँले तपाईंहरु मिल्नुस् मात्रै भन्नुभयो।’

शुक्रबार एक दिन अध्यादेश ल्याउनेबारे प्रधानमन्त्रीको धारणा बुझ्न र त्यसलाई रोक्नका लागि सहमतिको प्रयास गर्न जरुरी रहेको प्रचण्डले बैठकलाई जानकारी गराएका थिए।