काठमाडौं । नेकपा एमालेका अध्यक्ष केपी शर्मा ओलीले नामै नलिएर काठमाडौं महानगरपालिकाका मेयर बालेन शाहले तानाशाही प्रवृत्ति देखाएको बताएका छन् ।

शनिबार पार्टीको युवा संगठन राष्ट्रिय युवा संघ नेपालको कार्यक्रममा ओलीले उक्त कुरा बताएका हुन् ।

काठमाडौं महानगरपालिकाले हालै सडक विभाग र काठमाडौं डिभिजन सडक कार्यालयको गेट अगाडि फोहोर थुपारिदिएको घटनालाई लिएर ओलीले तानाशाही प्रवृत्ति देखाएको टिप्पणी गरेका हुन् ।

उनले भने, ‘मलाइ छिमेकीसँग अलिकति चित्त बुझेन रिस उठ्यो भने घरको फोहोर–सोहोर जम्मा गरेर उसका ढोकामा फ्याँकिदिने ? यो कुनै सभ्यता हो ?’

महत्वपूर्ण पदमा बसेको व्यक्तिले त्यस्तो व्यवहार गर्नु उचित नहुने भन्दै उनले त्यसको विरोध गर्न डराउन नहुने बताए ।
उनले भने, ‘यो महत्वपूर्ण पोस्टमा बस्ने मान्छेले गर्न मिल्ने ब्यवहार होइन, त्यत्ति पनि भन्न सकिँदैन, लाचारीबाट फाइदा लिएर एउटा एनार्किजमको बोलवाला भइरहेको छ, हामीले हाम्रो समाजलाई एनार्किस्ट बनाउन खोजेको होइन, डेमोक्रेटिक बनाउन खोजेको हो ।’

यस्तो प्रवृत्तिको पनि कसैले विरोध गर्न नसकेको भन्दै उनले असन्तुष्टि जनाए । उनले अगाडि भने , ‘म छक्क पर्छु, कत्ति साह्रो कमजोर प्रवृत्ति भएको होला मान्छेलाई ? कसैले अर्काको ढोकामा फोहोर फ्याँकिदिन्छ, यो गलत गर्‍यो भनेर कसैले भन्न सक्दैन ।’

अरुका घरअगाडि फोहोर थुपार्दा पनि एउटा भजन मण्डलीले वाहवाही गरिरहेको भन्दै ओलीले यस्ता प्रवृत्तिको विरोध गर्न आग्रह गरे ।

उनले भने, ‘उनीहरुको एउटा मण्डली हुन्छ, त्यो मण्डलीले वाह जन्मिएछ एउटा बहादुर क्याबात लेख्छ, अनि अरु चुप लागेर झोक्राएर बस्छन् । यत्ति पनि सत्य भन्न सकिँदैन यो त सभ्य तरिका भएन, यो आधुनिक सभ्य समाजलाई सुहाउँदो तरिका भएन ।’

कसैले गलत काम गर्छ भने त्यसलाई सम्झाउनुपर्ने भन्दै ओलीले युवाहरुले गलत कामको विरोध गर्न सक्नुपर्ने बताए ।