काठमाडौं । क्रिकेटर सन्दीप लामिछालाई बलात्कार अभियोगमा सफाइ दिएको छ। उच्च अदालत पाटनमा मंगलबार र बुधबारको सुनुवाइपछि न्यायाधीशद्वय सुदर्शनदेव भट्ट र अञ्जु उप्रेती ढकालको संयुक्त इजलासले लामिछानेलाई सफाइ दिएको छ । उच्च अदालत पाटनले जिल्ला अदालत काठमाडौंको फैसलालाई उल्ट्याइदिएको छ । उच्च अदालतले जिल्ला अदालतको फैसलालाई बदर गरेको उच्च अदालतका प्रवक्ता विमल पराजुलीले जानकारी दिए ।

१३ पुस २०८० मा जिल्ला अदालत काठमाडौंले बलात्कार अभियोगमा दोषी ठहर गरी २५ पुसमा सन्दीपविरुद्ध ८ वर्ष जेल सजाय, पीडितलाई ३ लाख रुपैयाँ क्षतिपूर्ति र २ लाख रुपैयाँ जरिवाना गर्ने फैसला सुनाएको थियो । जाहेरवालाको आंशिक दाबी पुग्ने जिल्ला अदालतको ठहर थियो । उक्त फैसलालाई चुनौती दिँदै सन्दीप उच्च अदालत पुगेका थिए । उच्चले सन्दीपको पक्षमा फैसला गरेको हो । सन्दीपलाई सफाइ दिन उच्च अदालतले केलाई आधार मान्यो खुल्न बाँकी छ ।

उच्च अदालतमा ११ फागुन २०८० मा सन्दीपको निवेदन दर्ता भएको थियो । त्यसयता पाँचपल्ट पेसी तोकिए पनि जेठ १ र २ गतेको सुनुवाइपछि फैसला आएको हो ।

उच्चको फैसलासँगै सन्दीपको क्रिकेट करिअर जोगिएको छ । सफाइ पाएसँगै उनको निलम्बन फुकुवा हुनेछ भने अब विश्वकप खेल्न पनि पाउनेछन् । तर, गौशाला २६ सँग सर्वोच्च अदालत जाने विकल्प बाँकी नै छ ।

यो मुद्दामा के के भयो

६ भदौ २०७९ मा नेपालको राष्ट्रिय क्रिकेट टिम मैत्रीपूर्ण खेलका लागि केन्या जाँदै थियो । यसैका लागि सन्दीपसहितका खेलाडी बन्द प्रशिक्षणमा थिए । केन्या उड्नुभन्दा अघिल्लो रात बन्द प्रशिक्षणबाट निस्केर सन्दीप आफ्नी ‘फ्यान’ गौशाला २६ लाई भेट्न गए । उनलाई गाडीमा राखेर नगरकोट गए । केही दिनदेखि सोसल मिडिया प्लेटफर्ममा कुराकानी गरिरहेका उनीहरू नगरकोटबाट फर्केर तिलगंगा अस्पतालछेउको गेस्ट हाउसमा बसे । भोलिपल्ट सन्दीप केन्या उडे ।

यसको १५ दिनपछि पीडित युवतीले २१ भदौ २०७९ मा सन्दीपले जबर्जस्ती करणी गरेको भन्दै काठमाडौं गौशाला प्रहरीमा उजुरी दिइन् । उजुरी दर्ता भएको दुई दिनपछि २३ भदौ २०७९ मा नेपाल क्रिकेट संघ ९क्यान० ले अनुशासन उल्लंघन गरेकोमा सन्दीपलाई राष्ट्रिय क्रिकेट टोलीबाट निलम्बन गर्‍यो ।

सन्दीप देशबाहिरै थिए । उनी लुकेर बसेको टिकाटिप्पणी नेपालमा हुँदै थियो । यसबीचमा उनले सोसल मिडियामा एक पोस्ट लेख्दै आफू छिट्टै फर्किने र अनुसन्धानमा सघाउने बताएका थिए ।

उनी २० असोज, २०७९ मा विदेशबाट फर्के तर त्रिभुवन अन्तर्राष्ट्रिय विमानस्थलबाटै प्रहरीले पक्राउ गरी हिरासतमा लियो ।

१४ कात्तिक २०७९ मा काठमाडौं जिल्ला अदालतमा सन्दीपविरुद्ध बलात्कार मुद्दा दर्ता भयो । हिरासतमै रहेका बेला २८ पुस, २०७९ मा पाटन उच्च अदालतले २० लाख रुपैयाँ धरौटी लिएर तारेखमा छोड्ने आदेश दियो । धरौटी बुझाएर सन्दीप बाहिर आए ।

१८ माघ, २०७९ मा क्यानले अनुशासन उल्लंघनको कारबाही गरिएको निलम्बन फुकुवा गर्‍यो । त्यो बेला नेपाली राष्ट्रिय टिमले देशबाहिर गएर महत्त्वपूर्ण प्रतियोगिताहरू खेल्नु थियो ।

सन्दीपका वकिलकै अनुरोधमा १६ फागुन, २०७९ मा सर्वोच्च अदालतले देशबाहिर गएर क्रिकेट खेल्न सन्दीपलाई अनुमति दियो ।

९ चैत, २०७९ मा उनको मुद्दामा किशोरीको जाँच गर्ने चिकित्सकलाई अदालतमा झिकाउन जिल्ला अदालत काठमाडौंले आदेश दियो । ७ जेठ, २०८० मा वडा कार्यालयबाट उजुरीकर्ताको जन्मदर्ताको अभिलेख र जन्म भएको भनिएको अस्पतालबाट दर्ता किताब झिकाउने आदेश भयो । ११ असार, २०८० मा गौशाला २६ लाई अन्तरिम राहतस्वरूप उपचार खर्च दिन जिल्ला अदालतले आदेश दियो ।

१३ पुस २०८० मा काठमाडौं जिल्ला अदालतका न्यायाधीश शिशिरराज ढकालको इजलासद्वारा सन्दीप लामिछानेले जबर्जस्ती करणी गरेको ठहर गरियो । सजाय निर्धारणका लागि २५ पुसको पेसी तोकियो ।

२५ पुस २०८० मा सन्दीपलाई आठ वर्ष जेल सजाय, पीडितलाई २ लाख रुपैयाँ क्षतिपूर्ति र ३ लाख रुपैयाँ जरिवाना सुनाइयो ।

१० फागुन २०८० मा सन्दीप आफैँ उपस्थित भएर उच्च अदालत पाटनमा जिल्ला अदालत काठमाडौंको फैसलाविरुद्ध पुनरावेदन दिए । १२ चैतमा निवेदन दर्ता भयो । पीडित पक्षका तर्फबाट गौशाला २६ नाबालिग नै रहेकाले त्यसैबमोजिम थप सजाय माग गर्दै २ चैत २०८० मा पुनरावेदन गरिएको थियो ।