हेटौंडा । मकवानपुरको हेटौडा ११ नवलपुरमा विपरित दिशाबाट आएका बस र ट्रक एक आपसमा ठोक्किँदा दुर्घटना भएको छ । गत राती भएको दुर्घटनामा २ जनाको मृत्यु भएको प्रहरीले जानकारी दिएको छ । मृत्यु हुनेमा १ जनाको सनाखत भएको छ । सनाखत भएका बस चालक चन्द्रागिरी नगरपालिका–२ काठमाडौंका २९ वर्षीय सरोज परियार रहेका मकवानपुरका प्रहरीले जनाएको छ ।

गएराती भएको सवारी दुर्घटनामा परेर घाइते भएका परियारको हेटौंडा अस्पतालमा उपचारको क्रममा मृत्यु भएको थियो । अर्का मृतकको भने सनाखत हुन सकेको छैन ।

जनकपुरबाट काठमाडौ तर्फ आइरहेको ना ७ ख ८७६ नम्वरको यात्रुबाहक बस विपरित दिशाबाट आइरहेको प्रदेश नम्वर २– ०३० १ ख ५०३५ नम्वरको ट्रक आपसमा ठोक्किएर दुर्घटना हुँदा दुई जनाको मृत्यु भएको जिल्ला प्रहरी कार्यालय मकवानपुरका प्रहरी नायव उपरीक्षक जयश्वर रिमालले जानकारी दिए ।

दुर्घटनामा १८ जना घाइते भएका छन् । घाइतेहरुमध्ये १५ जनाको चुरेहिल अस्पतालमा र मकवानपुर सहकारी अस्पतालमा उपचार भइरहेको प्रहरी नायव उपरीक्षक रिमालले जानकारी दिए ।
घाइते मध्ये बसका सहचालक जनक नन्दनी–६ बस्ने वर्ष १९ को शुवम झाको अवस्था गम्भिर रहेको प्रहरी नायव उपरिक्षक रिमालले बताए । घाइते झाको चुरेहिल अस्पतालमा उपचार भइरहेको छ ।

ट्रकका चालक बाराको निजगढ नगरपालिका–४ पुरानोटोल बस्ने वर्ष ३३ को टंकबहादुर विक सामान्य सामान्य घाइते छन् । उनलाई उपचार पछि प्रहरीले नियन्त्रणमा लिएको छ । घटनाबारे थप अनुसन्धान कार्य जारी रहेको प्रहरीले जनाएको छ ।