काठमाडौं । माओवादी केन्द्रबाट मंगलबार मन्त्री हुनेमा मुख्यतः प्रवक्ता नारायणकाजी श्रेष्ठ, जनार्दन शर्मा र वर्षमान पुन अनन्तको नाम चर्चामा रहेका छन् । आज साँझ ६ बजे प्रधानमन्त्री शेरबहादुर देउवाको शपथग्रहरण हुने भएको छ ।

मंगलबार कांग्रेस र माओवादी केन्द्रबाट केही मन्त्रीहरू शपथ गराउने तयारी भएपनि दुवै पार्टीमा को को मन्त्री हुने भन्नेमा भने निर्णय हुन सकेको छैन । माओवादी केन्द्रबाट श्रेष्ठको नेतृत्वमा सरकारमा जाने विषयमा छलफल भएको बुझिएपनि निर्णय गर्ने जिम्मा भने अध्यक्ष पुष्पकमल दाहाल प्रचण्डलाई दिएको छ ।

अन्य नेतामा स्थायी कमिटी सदस्य देवेन्द्र पौडेल र पम्फा भुसालको पनि मन्त्री हुनेमा चर्चा रहेको छ । माओवादी केन्द्रको तर्फबाट सकेसम्म मंगलबार नै दुई जना मन्त्रीले शपथ गर्ने तयारी रहेको बुझिएको छ ।

माओवादी केन्द्रका स्थायी कमिटी सदस्यमा पौडेल भने अहिलेसम्म मन्त्री भएका छैनन् । अन्य सदस्यहरू भने मन्त्री भइसकेको अनुभव मात्र होइन आआफ्नो काममा चर्चा कमाएका छन् ।