काठमाडौं । नेकपा एमालेको कार्यदलले पार्टीभित्र देखिएका विवाद समाधान गर्दै आइतबार सहमतिको घोषणा गर्ने तयारी गरेको छ । सिंहदरबारमा शनिबार बसेको कार्यदल बैठकमा असहमतिका केहि बिषयलाई टुङ्ग्याएको र आइतबार सहमतिको घोषणा हुने नेताहरुले जनाएका छन् ।

कार्यदलका सदस्य गोकर्ण विष्टले आइतबार सकारात्मक सन्देश प्रवाह गर्ने जानकारी दिए । उनले सहमतिका लागि अन्तिम अन्तिम अवस्थामा आइपुगेको र लगभग समस्यालाई समाधान खोज्ने विन्दुमा पुगेको बताए ।

एकताको सन्देश सुन्न आतुर कार्यकर्तालाई आइतबार सकारात्मक सन्देश दिने उनले बताए । उनले कार्यदललमा केहि औपचारिक काममात्र बाँकी रहेको जानकारी दिनुभयो । विष्टले पार्टीलाई एकताबद्ध गर्न दुवै पक्षले इमानदारी प्रयत्न गरेको जनाए ।

त्यस्तै एमाले नेता भीम रावलले कार्यदल अन्तिम विन्दुमा रहेको र छिटै निष्कर्षमा पुगिने बताए ।