ओली पक्ष एमाले स्थायी कमिटी बैठक बस्दै, १२ जना नेतामाथि हुने कारवाही रोकिने संभावना

काठमाडौं । नेकपा एमालेका अध्यक्ष केपी शर्मा ओली पक्षको स्थायी कमिटी बैठक आज बस्दैछ । बैठक बालुवाटारमा विहान ११ बजे बस्ने छ ।
आज बस्ने बैठकमा अध्यादेशबाट सरकारले प्रस्तुत गरेको बजेट,राष्ट्रिय सभाको निर्वाचनमा भएको पराजय, पार्टी भित्रको विवाद लगायतका विषयमा छलफल हुने बताइएको छ ।

गत साता १२ जना नेताहरुलाई स्पष्टीकरण सोेधेको छ । ती १२ नेतालाई कारवाही गर्ने या नगर्ने भन्ने विषयमा समेत आजको बैठकमा छलफल एक स्थायी कमिटी सदस्यले बताए । स्पष्टीकरण सोधिएकाहरुमा घनश्याम भूसाल, सुरेन्द्र पाण्डे, विरोध खतिवडा, जीवनराम श्रेष्ठ, सोमप्रसाद पाण्डे, कृष्णलाल महर्जन, झपट रावल, भवानी प्रसाद खापुङ, यज्ञ सुनुवार, मेटमणि चौधरी, दिपकप्रकाश भट्ट र नारायण खतिवडा रहेका छन्।

यसअघि ओली पक्षल वरिष्ठ नेता झलनाथ खनाल, माधव नेपाल, उपाध्यक्ष भीम रावललगायत ११ जना नेताहरुलाई साधारण सदस्य समेत नरहने गरी कारबाही गरिसकिएको छ।

स्पष्टीकरण र कारवाहीको प्रक्रियासंगै दोस्रो तहका नेताहरुबीच वार्ता पनि जारी रहेको छ । ओली पक्षले केन्द्र देखि प्रदेशसम्म खनाल नेपाल पक्षका नेता तथा सांसदहरुलाई स्पष्टीकरण सोध्ने र पार्टी सदस्य नै नरहेने गरी कारवाही गरेपनि दुबै तर्फका दोस्रो तहका नेताहरुभने वार्तामा जुटेका छन् । एमालेका दुवै पक्षका दोस्रो तहका नेताबीच सोमवार राति अबेरसम्म याक एण्ड यति होटलमा छलफल भएको बताइएको छ ।

याक एण्ड यति होटलमा भएको छलफलमा ओली पक्षका उपमहासचिव विष्णु पौडेल, सुवास नेम्वाङ र प्रदीप ज्ञवालीले र खनाल नेपाल पक्षबाट सुरेन्द्र पाण्डे, घनश्याम भुसाल, योगेश भट्टराई र गोकर्ण विष्ट सहमागी थिए । छलफलमा पार्टीलाई २०७५ जेठ २ मा फर्काएर सहमति खोज्ने प्रयास जारी रहेको सुभास नेम्वाङले जानकारी दिए ।

दोस्रो तहका नेताहरु यसअघि पनि याक एण्ड यति होटलमा बसेर पार्टीको विवाद समाधान गर्न छलफल गरेका थिए । तर छलफल भएको दोस्रो दिन नै माधव नेपाल पक्षले देउवालाई प्रधानमन्त्री बनाउन हस्ताक्षर गरेपछि वार्ता भाँडिएको थियो । सोमबार रातीको वार्ताले तत्काललाई १२ जना नेताहरु माथिको कारवाही स्थगन हुन सक्ने संभावना रहेको ओली पक्ष एक नेताले बताए ।

आजको बैठकमा जसपाको सरकारमा सहभागी हुने बारेमा छलफल हुने देखिन्छ । लुम्बिनीको राष्ट्रियसभा निर्वाचनको समीक्षा हुने बताइएको छ । माधव नेपाल पक्षले विपक्षी उम्मेदवारलाई मतदान गरेका कारण पराजय भएको निष्कर्ष ओली पक्षको छ ।