१२ जेठ । काठमाडौं । भारतले कोसी नदीको धार फर्काएपछि सप्तरीमा ९० परिवार विस्थापित भएका छन् ।

भारतले नदीको धार फर्काएपछि हनुमाननगर कंकालिनी नगरपालिका–१३ गोवरगाढाका बासिन्दा डुबानमा परेर विस्थापित भएका हुन् ।

विस्थापित परिवारका करिब ३ सय जना गोवरगाढाको थुम्कोमा आश्रय लिइरहेका छन् ।

भारतले केही वर्षअघिदेखि एकतर्फी रुपमा खन्दै आएको पाइलट च्यानलमा पानी छाडदा बस्ती डुबानमा परेको हो ।

पानी छाड्दा पूर्वजानकारीसमेत नदिएका कारण नेपालतर्फका ९० घरका करिब ३ सय जना विस्थापित भएको स्थानीयले बताए ।

क्यानलमा पानी छोड्दा स्थानीयस्तरमा पूर्वजानकारी गराउनुपर्नेमा भारतीय पक्षले कुनै जानकारी नै नगराई एक्कासि पानी छोडेको हनुमाननगर कंकालिनी नगरपालिकाका प्रमुख शैलेश साहले बताए ।

बर्खायाममा पानीको मुहान नै थुन्ने गरी भारतीय पक्षले एकतर्फी रूपमा बनाउने बाँधका कारण जिल्लाका विभिन्न भूभाग डुबानमा पर्ने गरेका छन् ।