काठमाडौं । जुड बेलिङघमको उत्कृष्ट दुई गोलको मद्दतले नर्वेलाई अतिरिक्त समयमा पराजित गर्दै इंग्ल्यान्ड फिफा विश्वकप २०२६ को सेमिफाइनलमा प्रवेश गरेको छ। अब इंग्ल्यान्ड सन् १९६६ पछि पहिलो पटक विश्वकपको फाइनलमा पुग्नबाट मात्र एक जित टाढा छ।

अमेरिकाको मियामीमा भएको अत्यधिक गर्मीबीच खेलिएको क्वार्टरफाइनल खेलमा नर्वेलाई अतिरिक्त समयमा २–१ गोलअन्तरले पराजित गर्दै इंग्ल्यान्ड विश्वकपको सेमिफाइनलमा प्रवेश गरेको हो ।

इंग्ल्यान्डको जितमा दुवै गोल जुड बेलिङ्‌घमले गरे । नर्वेका लागि आन्ड्रियास शेल्ड्रपले एक गोल गरेका थिए ।

निर्धारित ९० मिनेटको खेल १–१ गोलको बराबरीमा सकिएपछि खेल अतिरिक्त समयमा धकेलिएको थियो । खेलमा सुरुवाती अग्रता भने नर्वेले लिएको थियो ।

खेलको ३६औँ मिनेटमा नर्वेका लागि आन्ड्रियास शेल्ड्रपले गोल गर्दै सुरुवाती अग्रता दिलाएका थिए । तर, पहिलो हाफको इन्जुरी समयको दोस्रो मिनेटमा इंग्ल्यान्डका लागि जुड बेलिङ्घमले गोल गर्दै खेल १–१ गोलको बराबरीमा ल्याएका थिए ।

अब सेमिफाइनलमा इंग्ल्यान्डले अर्जेन्टिना वा स्विजरल्याण्डमध्ये एक टोलीसँग खेल्नेछ।

निकै प्रतिस्पर्धात्मक रहेको यस खेलको ३६औँ मिनेटमा आन्ड्रियास शेल्ड्रपको प्रहारले गोलरक्षक जोर्डन पिकफोर्डलाई झुक्याउँदै गोल भएपछि नर्वेले सुरुवाती अग्रता लिएको थियो।

इंग्ल्यान्डलाई तुरुन्तै गोलको आवश्यकता थियो। पहिलो हाफको इन्जुरी समयमा एन्थोनी गोर्डनको पासलाई उत्कृष्ट नियन्त्रणमा लिँदै बेलिङघमले नर्वेका गोलरक्षक ओर्यान निल्यान्डलाई छक्याएर गोल गर्दै खेल बराबरीमा ल्याए।

बिरामी र चोटसँग जुधिरहेका प्रभावशाली खेलाडी डेक्लान राइस र नोनी माड्युकेलाई प्रशिक्षक टुचेलले हाफ(टाइममै परिवर्तन गरे। उनीहरूको स्थानमा एबेरेची एजे र बुकायो साका मैदान प्रवेश गरेका थिए।

दोस्रो हाफमा नर्वेले इंग्ल्यान्डलाई निकै दबाबमा राख्यो। नर्वेका टोर्बजोन हेगेमले गरेको एक गोललाई रेफ्रीले मान्यता दिएनन्, किनभने सो गोलअघि एर्लिङ हालान्डले इंग्ल्यान्डका इलियट एण्डरसनलाई अनावश्यक रूपमा धकेलेका थिए। त्यस्तै, डेभिड मोलर वोल्फको हेड प्रहार बारमा लागेर फर्किएको थियो।

विश्वचर्चित स्ट्राइकर एर्लिङ हालान्ड यस खेलमा खासै जम्न सकेनन् र अतिरिक्त समयको सुरुवातमै उनलाई मैदानबाट सब्स्टिच्युट गरियो।

खेल अतिरिक्त समयमा गएको तीन मिनेटमै बेलिङघमले व्यक्तिगत दोस्रो गोल गरे। वैकल्पिक खेलाडी मोर्गन रोजर्सको प्रहारलाई नर्वेका गोलरक्षकले रोक्ने प्रयास गर्दा फर्किएको बललाई बेलिङघमले सदुपयोग गर्दै निर्णायक गोल गरे।

सन् १९६६ मा विश्वकप जितेयता इंग्ल्यान्ड तेस्रो पटक सेमिफाइनलमा पुगेको हो। यसअघि सन् १९९० मा पश्चिम जर्मनी र २०१८ मा क्रोएसियासँग सेमिफाइनलमा हारेको इंग्ल्यान्ड यसपटक भने आफ्नो भाग्य बदल्ने आशामा छ।