मदनले चुनावी प्रचार गर्न प्रयोग गरेको घर ३४ वर्ष पछि विद्या भण्डारीको सम्पर्क कार्यालय

काठमाडौं । मदन भण्डारीले २०४८ सालको निर्वाचनको लागि सम्पर्क कार्यालय बनाएको घर ३४ वर्ष पछि विद्यादेवी भण्डारीको सम्पर्क कार्यालय खोलिएको छ । मदन भण्डारीको ७५ औँ हीरक जन्मोत्सवको तयारी गर्न सम्पर्क कार्यालय खोलिएको छ ।

मदन भण्डारी फाउन्डेशनले मदन भण्डारीको ७५ औँ जन्मोत्सवको उपलक्ष्यमा हीरक महोत्सव मनाउँदै छ । सोही प्रयोजनका लागि सम्पर्क कार्यालय खोलिएको भनिएको छ । तर पूर्वराष्ट्रपति भण्डारीले एमालेको सक्रिय राजनीतिमा फर्किने निर्णय गरेपछि उनी निकट नेताहरूले नयाँ बानेश्वरको थापागाउँमा सम्पर्क कार्यालय खोलको छन् । उक्त कार्यालय लिएसँगै भण्डारीको सक्रिय राजनीतिको गतिविधि बढ्न थालेको अर्थमा हेरिएको छ ।

थापागाउँ हाइटमा सम्पर्क कार्यालय खोलेको घर मदन भण्डारीले २०४८ सालको चुनावमा उपयोग गरेका थिए। यो भवन २०४८ सालको चुनावको प्रचारका लागि भण्डारीले प्रयोग गरेका थिए । त्यतिबेला भण्डारीले काठमाडौं– १ बाट कांग्रेस नेता कृष्णप्रसाद भट्टराईलाई पराजित गरेका थिए । संयोग चाहिँ २०५१ सालको चुनावमा विद्या भण्डारीले पनि सोही भवनमार्फत प्रचारप्रसारको काम गरेकी थिइन् ।

हीरक महोत्सवका लागि भाडामा लिइएको भवन पूर्वराष्ट्रपति भण्डारीले उद्घाटन गर्ने चर्चा छ । तर, भण्डारीनिकट नेताहरूमै भने अहिले उक्त भवनको विषयमा दुईधार देखिएको छ । हीरक महोत्सवका लागि आवश्यक भवन भाडामा लिएको विषयलाई पूर्वराष्ट्रपतिसँग जोड्न नहुने एकथरी नेताहरूले बताएका छन् । उनी निकट नेताहरुले घर भाडामा लिएको विषयलाई पूर्वराष्ट्रपतिको सक्रिय राजनीतिसँग जोड्न नमिल्ने बताउछन्। उनले भने, ‘हीरक महोत्सवका गतिविधिका लागि आवश्यक भवन भाडामा लिएको विषयलाई पूर्वराष्ट्रपतिको राजनीतिसँग जोड्न मिल्दैन ।

ती नेताले अहिले गलत प्रचार गर्न खोजिएको दाबी गरे । तर, भण्डारीनिकट अर्कोथरी नेताहरू भने देशभरका कार्यकर्ताहरूको भेट गर्ने थलोको रूपमा उपयोग गर्न उक्त भवन भाडामा लिएको दाबी गरिरहेका छन् ।