काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले अखिल क्रान्तिकारीलाई पहिलो नम्बरको संगठन बनाउन निर्देशन दिएका छन्।

अखिल क्रान्तिकारी अध्यक्ष पञ्चा सिंह सहित कार्यालय टीमसँग भएको छलफलमा अध्यक्ष प्रचण्डले क्रान्तिकारीलाई देशको पहिलो संगठन बनाउन निर्देशन दिएका हुन् । उनले अहिले संगठभित्र देखिएकासमस्यालाई समाधान गर्न समेत भनेका छन् । संगठनलाई विस्तार गरी समाजमा राजनीतिक चेतना सहितको सन्देश दिन समेत निर्देशन दिएको अखिल क्रान्तिकारीका उपाध्यक्ष जिपी मैनालीले बताए।

निर्वाचनमा पार्टीले राम्रो नतिजा ल्याएको भन्दै प्रचण्डले युवा विद्यार्थी त्यही अनुसार अघि बढ्नुपर्ने बताएका थिए। पछिल्लो निर्वाचनमा पार्टीले युवालाई अघि बढाएको र अबको निर्वाचनमा पनि युवालाई अघि बढाउने प्रचण्डले प्रतिबद्धता जनाएका छन्।

संगठनका विविध विषयमा छलफल गर्न भएको बैठकमा माओवादीका नेता वर्षमान पुन,विद्यार्थी इन्चार्ज हितमान शाक्य र अखिल क्रान्तिकारीका पूर्व अध्यक्ष रञ्जित तामाङ सहभागी थिए।