हेटौंडा । हेटौंडामा वाइसिएल हेटौंडाको प्रथम नगर सम्मेलनको आइतबार उद्घाटन समारोहलाई सम्बोधन गदै वाइसियल इन्चार्ज रामप्रसाद सापकोटा दिपशिखाले आउदो निर्वाचनमा नेपाली कांग्रेससलाई हराउने दाबी गरेका छन् ।

माओवादीको केन्द्रीय सदस्यसमेत रहेका वाइसिएल इन्चार्ज सापकोटाले गठबन्धनको प्रमुख घटक कांग्रेसलाई निर्वाचनमा हराएर माओवादी पहिलो पार्टी बन्ने दाबी गरे । तर माओवादी केन्द्रलगायतका नेताहरुले भने सकेसम्म पाँचदलीय गठबन्धनलाई आगामी निर्वाचनसम्म निरन्तरता दिने बताइरहेका छन्।

सापकोटाले नेकपा एमालेका अध्यक्ष केपी शर्मा ओलीलाई लक्षित गर्दै एउटा फटाहा बार्दलीमा बसिरहेको बताए ।

त्यस्तै माओवादीको गायक टोलीले पनि आगामी निर्वाचनमा कांग्रेसलाई लुलो र एमालेलाई धुलो बनाउँदै माओवादी ठूलो दल बन्ने भन्दै गीत गाएका थिए।

हाल नेकपा माओवादी, कांग्रेस, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाको संयुक्त गठबन्धनको सरकार छ।

माओवादी अध्यक्ष पुष्पकमल दाहाल प्रचण्डले धेरै पटक सार्वजनिक कार्यक्रममा यही गठबन्धनलाई निर्वाचनसम्म लैजाने बताउँदै आएका छन्।