काठमाडौं । नेकपा (माओवादी केन्द्र) का पुष्पकमल दाहाल ‘प्रचण्ड’ले आफूलाई खोज्दै केपी ओली चितवन आइपुगेको बताएका छन् । शुक्रबार चितवनमा आयोजित कार्यक्रममा प्रचण्डले एमाले अध्यक्ष केपी शर्मा ओली आफुलाई खोज्दै चितवनसम्म आइपुगेको बताएका छन् ।

उनले भने ‘एमालेको महाधिवेशन चितवनमा हुने भएपछि अब प्रचण्ड भाग्छ र कालीकोट जान्छ कि बर्दिया जान्छ । मैले अस्ति यहाँ आएर भनिसकेको छु, म कतै जान्न अब । केपी ओलीलाई कुनै भ्रम नरहोस् , त्यो आत्मघाती या आत्मरति पनि नगरे हुन्छ । म भाग्ने मान्छे हुँदै होइन । त्यो कुरा ओलीजीहरूलाई राम्रोसँग थाहा छ । त्यही भएर त मलाई खोज्दैखोज्दै आउनुभएको छ चितवन ।’

उनले कांग्रेसको जिल्ला सपभापतिले प्रचण्ड र रेणु दाहाललाई लेखेट्ने भनेको कुरा सुन्दा विडम्बना लागेको बताए । उनले भने ‘ कांग्रेस र माओवादी चुनावमा हाराहारी छौ । तर पनि शेरबहादुर देउवालाई प्रधानमन्त्री बनाएकोमा कांग्रेसका कार्यकर्ता खुसी होलान् भन्ने लागेको थियो तर यहाँ त त्यसको विपरीत देखियो।’
केहि दिनदेखि प्रचण्ड गृहजिल्ला चितवनमा शहिद परिवार र नेताकार्यकर्ताको घरदैलोमा भेटघाट गरीरहेका छन् ।