काठमाडौं । काठमाडौंमा पेस्तोल देखाएर सुन पसलमा लुटपाट गर्ने प्रयास गरेका तीन जनालाई घटनामा प्रहरीले पक्राउ गरेको छ।

वैशाख १७ गते इन्द्रचोकस्थित नैना एन्ड इसन ज्वेलर्समा दुई जनाले लुटपाट प्रयास गरेको आरोपमा दुई जनालाई पक्राउ गरेको जिल्ला प्रहरी परिसर काठमाडौंका एसपी पवनकुमार भट्टराईले जानकारी दिए।

उनका अनुसार पक्राउ पर्नेमा विकेश राजवाहक र अरूण भुजेल छन्। उनीहरूबाट प्रहरीले एउटा पेस्तोल समेत बरामद गरेको छ।

अर्का एक जनालाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो। पक्राउ पर्ने व्यक्ति ललितपुरका हरिकृष्ण महर्जन हुन्।

उक्त घटनाको भिडिओ सामाजिक सञ्जालमा समेत बाहिरिएको थियो। जहाँ हेलमेट, नकाब र कालो कपडा लगाएका दुई जना पसल छिरेको देखिन्छ। एक्लै बसिरहेकी एक जना महिलालाई उनीहरूले पेस्तोल तेर्साएर लुट्ने प्रयास गरेको भिडिओमा देखिएको छ।

ती महिला कर्मचारीले पनि त्यस घटनामा प्रतिरोध गरेपछि उनीहरू भागेका थिए।

एसपी भट्टराईका अनुसार उनीहरूले त्यस दिन लुट्न सकेका थिएनन्।