काठमाडौँ । नेपाली कांग्रेसले फागुन २१ गते हुने प्रतिनिधिसभा निर्वाचन हुन नदिने तत्त्व सक्रिय रहेको बताएको छ । चुनाव हुन नदिने तत्त्वहरूको रणनीति असफल बनाउँदै ससमयमै निर्वाचन गराउन सरकार द‌ृढ हुनुपर्ने कांग्रेसले पत्रकार सम्मलेलनमा जानकारी दिएको छ ।

आइतबार पार्टी केन्द्रीय कार्यालय सानेपामा पत्रकार सम्मेलन गर्दै कांग्रेस प्रवक्ता देवराज चालिसेले उक्त कुरा बताएका हुन् ।

‘चुनाव समयमा हुन नदिन विभिन्न तत्त्वहरू लागिरहेका छन् । सरकार दृढ भएर समयमै निर्वाचन सम्पन्न गर्नुपर्छ,’ प्रवक्ता चालिसेले भने, ‘लोकतान्त्रिक शासन व्यवस्थामा शासनको वैधताको स्रोत जनताको मत हो । लोकतान्त्रिक पार्टीले जन सर्वोच्चतालाई स्वीकार्नुपर्छ । हामीले स्वीकारेका छौँ ।’

उनले सबै पार्टीहरूले निर्वाचनमा भाग लिनेबाहेक विकल्प सोच्न नहुने पनि बताए । पूर्वराजा ज्ञानेन्द्रले निर्वाचन अगाडि राष्ट्रिय सहमतिको कुरा गरेका छन् नि भन्ने पत्रकारहरूको प्रश्नमा प्रवक्ता चालिसेले सबैको व्यक्तिगत स्वतन्त्रता हुने भन्दै निजी अभिव्यक्तिमा कुनै टिप्पणी नरहेको बताए ।

‘सबैको व्यक्तिगत स्वतन्त्रता हुन्छ । निजी स्वतन्त्रताप्रति कुनै टिप्पणी छैन,’ प्रवक्ता चालिसेले भने, ‘तर शासनको वैधताको स्रोत निर्वाचन र जनताको मत हो । निर्वाचनपछि बन्ने जनमतको सरकारले जनताका समस्या समाधान गर्नेछ ।’