काठमाडौँ । बागमती प्रदेश सरकारमा सहभागी नेकपा एमालेका मन्त्रीहरूले सामूहिक राजीनामा दिने तयारी गरेका छन्। आज बुधबार उनीहरूले मुख्यमन्त्री इन्द्रबहादुर बानियाँलाई सामूहिक रूपमा राजीनामा पत्र बुझाउदै छन् ।

उनीहरूले मुख्यमन्त्री वानियाँलाई दिउँसो २ बजे भेटेर राजीनामा पत्र बुझाउन लागेका हुन् । एमाले बागमती प्रदेश संसदीय दलका नेता जगन्नाथ थपलियाले मुख्यमन्त्री बानियाँलाई सम्बोधन गर्दै लेखेको मन्त्रीहरूले राजीनामा बुधबारबाटै लागू हुनेगरी राजीनामा दिएको उल्लेख छ । पत्रमा नेपालको संविधानको धारा १६८ को उपधारा (२) बमोजिम एमालेको निर्णय तथा वर्तमान राजनीतिक परिस्थितिलाई दृष्टिगत गर्दै सरकारमा सहभागी सबै मन्त्रीले आजकै मितिदेखि लागू हुने गरी संयुक्त रूपमा राजीनामा दिएको उल्लेख छ ।

साथै, उक्त राजीनामा स्वीकार गरी आवश्यक संवैधानिक तथा कानुनी प्रक्रिया अगाडि बढाउन आग्रह गरिएको छ । राजीनामासँगै बानियाँ नेतृत्वको सरकारलाई दिएको समर्थन समेत फिर्ता गर्ने एमालेको तयारी छ ।
एमाले कांग्रेसबीच गठबन्धनमा खटपट भएपछि बागमति , कर्णाली, कोशी, लुम्बिनी र सुदूरपश्चिम सरकारमा नयाँ सरकार बन्ने देखिन्छ । नयाँ सरकार बनाउन नेपाली कम्युनिस्ट पार्टी निर्णायक बनेको छ ।