काठमाडौं । बाँसबारी छालाजुत्ता कारखानाको १० रोपनी जग्गा हिनामिना प्रकरणमा सांसद विनोद चौधरीसंग सरकारी वकिलको रोहबरमा केन्द्रीय अनुसन्धान ब्यूरो (सीआईबी)ले बिहीबार करिब ३ घन्टा बयान लिएको छ। माइतीघर मण्डलास्थित जिल्ला सरकारी वकिल कार्यालय काठमाडौँमा बोलाएर चौधरीसँग सीआईबीका अनुसन्धान अधिकृतहरू र सो मुद्दा हेर्ने सरकारी वकिलले बयान लिएका हुन् ।

बाँसबारी छालाजुत्ता कारखानामा स्थापना गरिएको च्याम्पियन फुटवेयर मार्फत ‘चौधरी समूह’ले जग्गा निजीकरण गरेको सीआईबीको प्रारम्भिक अनुसन्धानको निष्कर्ष छ । त्यसबेला बाँसबारी छालाजुत्ता कारखानाका लिमिटेडको नामको १० रोपनी जग्गा हाल चाँदबाग रेसिडेन्सी प्रालिको नाममा आएको छ ।

च्याम्पियन फुटवेरको संचालक समितिमा विनोद चौधरी, उनका बुवा लुनकरणदास र भाइ अरुण चौधरी थिए । संचालक समितिमा रहेर व्यवस्थापकीय भूमिका खेलेको हुनाले कांग्रेस सांसद चौधरीसँग बयान लिइएको अनुसन्धानमा संलग्न अधिकृतहरू बताउँछन् ।

बाँसबारी छालाजुत्ता कारखानाका लिमिटेडसँग पुँजी थोरै भएको तर, प्रविधि भएको हुनाले लगानी गर्न आग्रह गरेपछि चौधरी समूहले च्याम्पियन फुटवेरमा लगानी गरेको विनोद चौधरीले बयानमा बताएका छन् । बयानमा उनले भनेका छन्,‘पुँजी कम थियो तर, प्रविधि उनीहरूसँग थियो । पार्टनरसिपमा काम गर्न आह्वान गरेपनि हामी संलग्न भएका हौँ ।’

चौधरी समूहको ३६ लाख लगानीमा सरकारसँगको साझेदारीमा स्थापना गरिएको ‘च्याम्पियन फुटवेयर’ मार्फत १० रोपनी जग्गा अरुण चौधरी समेतले निजीकरण गरेको सीआईबीको अनुसन्धान निष्कर्ष छ । चौधरी समूहले २०४४ सालमा ६ रोपनी र त्यसपछि ४ रोपनी जग्गा निजीकरण गरेका हुन् । २०७५ मा सो जग्गा चाँदबाग रेसिडेन्सी प्रा।लिको नाममा लगेको प्रहरीको अनुसन्धानबाट थाहा भएको छ ।

च्याम्पियन फुटवेयरमा लगानी गर्दा जग्गा हडप्ने उद्देश्य नराखिएको विनोदको जिकिर छ । बयानमा उनले भनेका छन्,‘त्यसबेला ठमेलमा १ लाखमा जग्गा आउँथ्यो, कानुन अनुसार जग्गा लिएको हुनाले हाम्रो गल्ती केही छैन ।’

ब्युरोका अधिकारी र सरकारी वकिलसँग चौधरीले ‘सहयोग गर्न आएको हुँ’ भनेका छन् । अनुसन्धानमा संलग्न एकजना अधिकृत भन्छन्,‘उहाँले अनुसन्धानलाई सहयोग गर्न आएको हुँ भन्नुभयो ।’

प्रहरीको केन्द्रीय अनुसन्धान ब्यूरोले बुधबार उनका अर्का भाइ वसन्त चौधरीलाई पनि घटना विवरण कागज गराएको थियो ।