काठमाडौं । नेकपा एमालेका नेता तथा प्रदेश सभाका सदस्य वेदबहादुर गुरुङले सूर्य चिह्न मन नपरे तारामा भोट हाल्न आग्रह गरेका छन् ।

सोमबार वक्तव्यमार्फत उनले वैचारिक हिसाबले मत परिवर्तन नगर्न र एमाले मन नपरे नेपाली कम्युनिस्ट पार्टीलाई मत दिन आग्रह गरेका हुन् ।

‘कम्युनिस्ट पार्टीको मत आ आफ्नो पार्टीमा चित्त नबुझेको हो भने अर्को कम्युनिस्ट पार्टीमा हालौँ बुर्जुवातिर सार्ने गल्ती नगरौँ,’ उनले भने, ‘ठ्याक्कै भन्नुपर्दा सबैले मत एमालेको सूर्य चिह्मा हालौँ, यदि त्यहाँ पनि चित्त नबुझेको हो भने नेकपाको तारा चिह्नमा हालौँ तर अन्य पार्टीमा नहालौँ ।’

उनले कम्युनिस्टहरूको मत धेरै भए पनि विभाजित भएका कारण समस्या परेको बताएका छन् ।

‘विगतमा माओवादीको आकार बढ्दा एमालेको आकार घटेको थियो । एमालेको आकार बढ्दा माओवादीको घटेको थियो,’ उनले अघि भने, ‘एमाले र माओवादी मिल्दा झण्डै दुई तिहाइ पुगेको थियो । तर अहिलेको निर्वाचनमा ती दुई पार्टीमा भोट हाल्दै आएका मतदाताहरूले परिवर्तनको नाममा बुर्जुवा पार्टीलाई भोट हाले सधैँको लागि बुर्जुवा वर्गमा पलायन हुन सक्छन् ।’

गुरुङ गण्डकीको पूर्वमन्त्री हुन् भने मादी गाउँपालिकाका पूर्वअध्यक्ष हुन् । उनको क्षेत्र कास्की–१ मा एमालेबाट बैनबहादुर अधिकारी उठेका छन् भने नेकपाबाट राजकाजी गुरुङ करण उम्मेदवार छन् । उनको वक्तव्यलाई लिएर केहीले गुरुङ समुदायको भएकाले गुरुङलाई मत मागेको तर्क गरेका छन् ।

यस्तो छ उनको भनाइ

नेपालमा बामपन्थी कम्युनिस्टहरुको मत बढी छ तर विभाजित छ । विभाजित हुनु दुर्भाग्य हो तर कम्युनिस्टको मत कम्युनिस्ट पार्टीमा नै यता उता हुनु अर्थात् अन्त बुर्जुवा पार्टीतिर नसर्नु सकारात्मक थियो। विगतमा माओबादी को आकार बढ्दा एमालेको आकार घटेको थियो एमालेको आकार बढ्दा माओवादीको घटेको थियो एमाले माओबादी मिल्दा झण्डै दुई तिहाई पुगेको थियो ।

तर, अहिलेको निर्वाचनमा ती दुई पार्टीमा भोट हाल्दै आएका मतदाताहरुले कतै मत परिवर्तनको नाममा बुर्जुवा पार्टीलाई भोट हालेमा तिनीहरू फेरि बामपन्थी पार्टीमा फर्केर आउने सम्भावना कम हुन्छ अर्थात् तिनीहरू सधैंको लागि बुर्जुवा वर्गमा पलायन हुन सक्छन्।अर्को पालीको निर्वाचनमा नेपालमा बामपन्थी कम्युनिस्ट पार्टीहरू रक्षात्मक र कमजोर हुन सक्छन ।

त्यसैले कम्युनिस्ट पार्टीको मत आ आफ्नो पार्टीमा चित्त नबुझेको हो भने अर्को कम्युनिस्ट पार्टीमा हालौं बुर्जुवातिर सार्ने गल्ती नगरौं। ठ्याक्कै भन्नु पर्दा सबैले मत एमालेको सूर्य चिन्हमा हालौं, यदि त्यहाँ पनि चित्त नबुझेको हो भने नेकपाको तारा चिन्हमा हालौं तर अन्य पार्टीमा नहालौँ ।