काठमाडौं । नेपाली कांग्रेसले प्रतिनिधि सभाका सभामुख देवराज घिमिरेलाई विघटित प्रतिनिधि सभा पुनर्स्थापनाको माग लिएर अदालत नजाने स्पष्ट पारेको छ। कांग्रेसका निवर्तमान प्रमुख सचेतक श्यामकुमार घिमिरेले सभामुख घिमिरेलाई
कांग्रेसको प्राथमिकतामा चुनाव रहेको बताएका हुन्।

सभामुखले आइतबार कांग्रेस र एमालेका निवर्तमान प्रमुख सचेतकसँग संयुक्त छलफल गरेका थिए। भेटमा कांग्रेसका तर्फबाट घिमिरेले आफूहरू प्रतिनिधि सभा पुनर्स्थापनाको पक्षमा अदालत नजाने जानकारी गराएका हुन्।

घिमिरेकै अगुवाइमा विघटित प्रतिनिधि सभाका कांग्रेसका केही सांसदहरूले प्रतिनिधि सभा पुनर्स्थापनाको पक्षमा हस्ताक्षर अभियान सञ्चालन गरे पनि सभापति शेरबहादुर देउवा पक्षकै कतिपय सांसदले हस्ताक्षर गरेनन् भने महामन्त्री गगन थापा, विश्वप्रकाश शर्मा र नेता शेखर कोइरालाले हस्ताक्षर अभियानप्रति असहमति नै राखेका थिए।

छलफलमा एमालेका बर्तौलाले भने कांग्रेस र एमालेले निर्णय गर्ने हो भने प्रतिनिधि सभा पुनर्स्थापनाको माग गर्दै अदालत जान सकिने बताएका थिए। यसअघि सभामुख घिमिरे आफैँ प्रतिनिधि सभा पुनर्स्थापनाका पक्षमा अदालत जाने तयारी गरे पनि पछि हटेका थिए।