काठमाडौँ । नेपाली कांग्रेसका नेता प्रकाश रसाइली ‘स्नेही’ ले घुस काण्डमा मुछिएका नेकपा (एमाले) का मन्त्रीहरूले नैतिकताको आधारमा राजीनामा दिनुपर्ने बताएका छन् ।

शनिबार रिपोर्टर्स क्लब नेपालमा आयोजित पत्रकार सम्मेलनलाई सम्बोधन गर्दै नेता रसाइलीले मन्त्रीहरू आफैँले नैतिकताको आधारमा राजीनामा नदिने हो भने प्रधानमन्त्री केपी शर्मा ओलीले उनीहरूलाई बर्खास्त गर्नुपर्ने बताएका हुन् । सामान्य प्रशासन मन्त्री राजकुमार गुप्ताले घुस डिल गरेको अडियो रेकर्ड बाहिरिएको थियो । उक्त प्रकरणमा भूमिमन्त्री बलराम अधिकारी पनि जोडिएका छन् । अधिकारी र गुप्ता दुवै एमालेका मन्त्री हुन् ।

‘त्यसमा सरकारले आन्तरिक छानबिन पनि गर्ने, मन्त्रीको नाम आइसकेपछि, मन्त्रीको भ्वाइस रेकर्ड नै बाहिर आएपछि त्यसमा सरकारको आन्तरिक छलफलको विषय पनि बनाउनुपर्छ । सरकारका मन्त्रीहरूले पनि नैतिकता प्रदर्शन गर्नुपर्छ । मूलधारका मिडियामा सरकारका मन्त्रीहरूको वार्तालाप नै बाहिर आयो । यसले सरकारमाथि चुनौती थपिएको छ । सरकारले यसमा छानबिन पनि गर्नुपर्छ । सरकारका मन्त्रीहरूले नैतिकता पनि देखाउनुपर्छ । पहिलो कुरा मन्त्रीहरूले राजीनामा दिनुपर्छ । यदि भएन भने प्रधानमन्त्रीले बर्खास्त गर्नुपर्छ,’ रसाइलीले भने ।

साथै, उनले एक वर्षे कार्यकालमा सरकारले एकदमै उत्कृष्ट अङ्क ल्यायो भन्न सकिने अवस्था नरहेको बताए । सरकारका केही मन्त्रीहरू र प्रधानमन्त्री केपी शर्मा ओलीले केही गर्न खोजेजस्तो हुटहुटी भने देखिएको उनको बुझाइ छ । उनले सरकारले नेपाली जनताको चाहनाअनुसार काम गर्न नसकेको बताए । यद्यपि, सरकार पूर्णरुपमा असफल भने नभएको उनको दाबी छ ।