काठमाडौं । आज आइतबार सत्तारु‌ढ कांग्रेस सांसद पूर्णबहादुर तामाङले उपप्रधान तथा सहकारी विकासमन्त्री प्रकाशमान सिंह र अर्थमन्त्री विष्णु पौडेल आगामी निर्वाचनबाट संसद्‍मा नआऊन् भनेर प्रतिनिधिसभाको रोस्ट्रमबाट नै प्रार्थना गरेका छन्।

बजेट विनियोजनमा सिंह र पौडेलले मन्त्रालयगत आयोजना वितरण गर्दा आ–आफ्ना निर्वाचन क्षेत्र र जिल्लालाई मात्रै केन्द्रित गरेको भन्दै उनले आक्रोस पोखेका छन् । सिंहले काठमाडौं र पौडेलले रुपन्देहीमा मात्रै बजेट केन्द्रित गरको तामाङको भनाइ थियो। उनले भने, ‘२०८४ को चुनावमा यी दुईवटै उपप्रधानमन्त्री यो हाउसमा नआओस् भन्ने कुरा बुद्ध भगवान र पशुपितिनाथसँग प्रार्थना गर्छु ।’

मन्त्रीहरुले आआफ्नो जिल्लामा बजेट विनियोजन धेरै गरेको भन्दै संसदमा प्रतिपक्षका सांसद मात्र होइनन सत्ता पक्षका सांसदहरुले पनि आलोचना गरिरहेका छन् । आज संसदमा बोल्ने क्रममा तामाङले भनेका थिए ‘यहाँहरूले ३ करोडभन्दा मुनीको बजेट विनियोजन नगर्ने भन्नुभएको होइन, उपप्रधानमन्त्रीहरूलेरु आज काठमाडौं जिल्लामा २ लाखदेखि २ करोडसम्मका १५० योजना छन् । रुपन्देहीमा ७९ वटा हाल्ने ? यसरी चल्छ ?’

सिंहले सहरी विकास मन्त्रालयका २०७ योजना काठमाडौं जिल्लामा मात्रै राखेको र अन्य जिल्लामा वितरण नगरेको उनको आरोप छ। सिंह र तामाङ दुवै कांग्रेसका सांसद हुन्।

सिंहविरुद्ध पार्टीको आगामी महाधिवेशनमा प्रश्न उठाउने पनि तामाङको भनाइ छ।

उनले भने, ‘तपाईं प्रधानमन्त्रीको लाइनमा रहेको मान्छे अब के हुनुहुन्छ ? राजनीतिमा कहाँ जानुहुन्छ ? यस्तै तरिकाले ७७ जिल्लाको, हामी हो नि महाधिवेशन भएर १५औँमा आउने। त्यतिबेला नाराजुलुस गरिदियो भने तपाईंको इज्जत कहाँ पुग्छ ? तपाईंले काठमाडौं जिल्लालाई मात्रै देख्ने ? १५औँ महाधिवेशनमा तपाईंसँग छलफल हुन्छ । हामी पनि चुनाव त जितेर आउँला नि। तपाईंलाई मैले दलमा भन्ने कुरा गरन लागेको थिए, दलले बैठक राखेन।’

सिंहको तरिकाले राजनीति नसप्रिने बताएका छन् । उनले भने, ‘प्रधानमन्त्री र पार्टी सभापति हुने आशा गरेको थिए । यो तरिकाले देश चल्दैन, डुब्छ। कांग्रेसहरू डुबिसक्यो ।’

उपप्रधान तथा अर्थमन्त्री पौडेललाई पनि सांसद तामाङले आगामी चुनावमा चुनौती दिने चेतावनी दिए।‘ुम पनि रुपन्देहीमा हुर्किएर आएको मान्छे हो। हाम्रो पनि त्यहाँ साथी छन् । तपाईं पनि ६ महिना अगाडि आएको पार्टीलाई ६८३ मतले मात्रै जितेर आउनुभएको हो। ख्याल गर्नुपर्छ। सबैलाई मिलाउनुपर्छ,’ उनले भने, ‘अर्थमन्त्रीज्यू, तपाईं कांग्रेसको फेला नपरेको हो। घण्टीलाई ६८३ मतले मात्रै जित्नुभएको हो। सबैको रिपोर्ट लिएर बसेका छौं।’

आजै कांग्रेसकै नेता अर्जुननरसिंह केसीले पनि सरकारको बजेटमाथि आलोचना गरेका थिए।