काठमाडाैं । भारत र पाकिस्तानबीच बढ्दो तनावका बीच शनिबार भारतका विदेशमन्त्री एस जयशंकरले सामाजिक सञ्जालमा एक पोस्ट गरेर भनेका छन् कि भारत र पाकिस्तानबीच आजबाट गोलीबारी र सैन्य कारबाही रोक्ने सहमति भएको छ।

विदेशमन्त्री एस जयशंकरले आफ्नो पोस्टमा लेखेका छन्, ‘आतंकवादका सबै रूपविरुद्ध भारतले निरन्तर कठोर र नझुक्ने अडान अपनाएको छ। यो त्यसैलाई निरन्तरता दिनेछ।’

यसअघि अमेरिकी राष्ट्रपति डोनाल्ड ट्रम्पले भारत र पाकिस्तानबीच तत्काल र पूर्ण युद्धविराममा सहमति भएको जानकारी दिएका थिए।

पाकिस्तानका उपप्रधानमन्त्री इसहाक डारले पनि युद्धविराममा सहमति भएको पुष्टि गरेका छन्।

भारतका विदेश सचिव

भारतका विदेश सचिव विक्रम मिस्रीले युद्धविराममा भएको सहमतिबारे जानकारी दिँदै भने कि शनिबार साँझ ५ बजेदेखि दुवै पक्षले सैन्य कारबाही र गोलीबारी रोक्ने निर्देशन जारी गरेका छन्।

विक्रम मिस्रीले शनिबार साँझ अचानक पत्रकार सम्मेलन बोलाएर बयान दिए।

उनले भने, ‘पाकिस्तानका सैन्य सञ्चालनका महानिर्देशकले भारतका आफ्ना समकक्षलाई आज दिउँसो ३.३५ मा फोन गरेका थिए। उनीहरूबीच सहमति भएको छ कि दुवै पक्षले आज साँझ ५ बजेदेखि जमिन, समुद्र र हावाबाट गोलीबारी बन्द गर्नेछन्।’

उनले थपे, ‘दुवै पक्षबाट यस सम्बन्धमा निर्देशन जारी गरिएको छ। दुवै देशका सैन्य सञ्चालनका महानिर्देशक सोमबार, १२ मे मा दिउँसो १२ बजे पुनः कुराकानी गर्नेछन् ।’

डोनाल्ड ट्रम्प

शनिबार डोनाल्ड ट्रम्पले सामाजिक सञ्जालमा एक पोस्टमा भने, ‘भारत र पाकिस्तानले पूर्ण र तत्काल युद्धविराममा सहमति जनाएका छन्।’

ट्रम्पले आफ्नो सामाजिक सञ्जाल प्लेटफर्म ट्रुथ सोशलमा एक पोस्टमा लेखे, ‘अमेरिकाको मध्यस्थतामा भएको लामो कुराकानीपछि, मलाई यो घोषणा गर्न पाउँदा खुशी लागेको छ कि भारत र पाकिस्तानले पूर्ण र तत्काल युद्धविराममा सहमति जनाएका छन्।’

केही समयपछि अमेरिकी विदेशमन्त्री मार्को रुबियोले सामाजिक सञ्जालमा एक पोस्टमा भने कि भारत र पाकिस्तानले व्यापक मुद्दाहरूमा कुराकानी शुरू गर्ने सहमति जनाएका छन्।

उनले लेखे, ‘मलाई यो बताउन पाउँदा खुशी लागेको छ कि भारत र पाकिस्तानले तत्काल युद्धविराम गर्ने र निष्पक्ष स्थानमा व्यापक मुद्दाहरूमा कुराकानी गर्न सहमत भएका छन्।’

उनले थपे, ‘हामी शान्तिको मार्ग रोज्नेमा प्रधानमन्त्री मोदी र शरीफको बुद्धिमत्ता, विवेक र कूटनीतिको प्रशंसा गर्छौं।’

पाकिस्तानका उपप्रधानमन्त्री

पाकिस्तानका उपप्रधानमन्त्री र विदेशमन्त्री इसहाक डारले पनि सामाजिक सञ्जालमा एक पोस्टमार्फत जानकारी दिए कि ‘पाकिस्तान र भारत पूर्ण र तत्काल युद्धविराममा सहमत भएका छन्।’

इसहाक डारले भने, ‘पाकिस्तान र भारत तत्काल प्रभावबाट युद्धविराम गर्न तयार भएका छन्। पाकिस्तानले सधैं आफ्नो सार्वभौमसत्ता र क्षेत्रीय अखण्डतामा सम्झौता नगरी क्षेत्रमा शान्ति र सुरक्षा चाहेको छ।’

युद्धविराममा सहमति भएको जानकारी यस्तो समयमा आएको छ जब पछिल्लो २४ घण्टामा भारत र पाकिस्तानबीच तनाव निरन्तर बढिरहेको थियो र भारतले पाकिस्तानमाथि लामो दूरीका हाई स्पीड मिसाइलहरू प्रयोग गरेको आरोप लगाएको थियो।

काश्मिरको पहलगाममा एक जना नेपालीसहित २६ जनाको आतंकवादीले हत्या गरेपछि भारतले त्यसको दोष  पाकिस्तानमाथि लगाउँदै मिसाइल आक्रमण गरेको थियो । भारतले आक्रमण गरेको तेस्रो दिन पाकिस्तानले पनि जवाफी आक्रमण गरेको थियो ।