Swornakshar Logo

बागमतीका प्रदेश प्रमुख प्रसाईं हटाइए, यादव शर्मा सिफारिस

हेटौंडा । प्रस्तावित नेकपा एमाले समाजवादीका अध्यक्ष माधवकुमार नेपालको कोटाबाट सरकारले वाग्मती प्रदेश प्रमुखमा यादवच्नद्र शर्मालाई नियुक्तिका लागि सिफारिस गरेको छ । हालका प्रदेश प्रमुख विष्णुप्रसाद प्रसाईंलाई हटाएर यादव शर्मालाई प्रदेश प्रमुख नियुक्तिका लागि सिफारिस गरेको प्रधानमन्त्री निकट स्रोतले जानकारी दिएको छ ।

मन्त्रिपरिषद्को बिहीबारको बैठकले संखुवासभाका शर्मालाई प्रदेश प्रमुखमा नियुक्तिका लागि सिफारिस गरेको हो । राष्ट्रपतिले नियुक्त गरेर शपथ ग्रहण भएसँगै शर्माले वागमती प्रदेश प्रमुखको कार्यभार सम्हाल्ने छन् ।

शर्मा नेकपा एमालेको विदेश विभागका पूर्वसचिव हुन् । उनले लामो समय माधवकुमार नेपालको सचिवालयमा रहेर काम गरेका थिए । त्यस्तै, वामदेव गौतम र मदन भण्डारीको सचिवालयमा रहेर पनि उनले काम गरेका थिए । शर्माले अंग्रेजी विषयको प्राध्यापन गर्दै आएका थिए ।

वाग्मती प्रदेशमा सरकार परिवर्तन भएसँगै सरकारले प्रदेश प्रमुख फेर्न लागेको हो । हाल वाग्मती प्रदेश प्रमुखमा विष्णु प्रसाईं रहेका छन् । उनलाई सरकारले फिर्ता बोलाएर शर्मालाई पठाउने निर्णय गरेको हो । बुधबार मात्रै वाग्मती प्रदेशको मुख्यमन्त्रीमा अष्टलक्ष्मी शाक्यले शपथ लिएकी थिइन् ।

सरकारले यसअघि लुम्बिनी, गण्डकी र प्रदेश २ मा पनि प्रदेश प्रमुखको हेरफेर गरेको थियो । लुम्बिनीमा अमिक शेरचन, गण्डकीमा पृथ्वीमानसिंह गुरुङ र प्रदेश २ मा हरिशंकर मिश्रलाई प्रदेश प्रमुख नियुक्त गरेको छ । गुरुङ र मिश्र कांग्रेसका नेता हुन् भने शेरचन माओवादी केन्द्रका नेता हुन् ।