Swornakshar Logo

विप्लव र कमल थापाबीच भेटवार्ता , तीन बुँदे सहमति कार्यान्वयनमा जोड

काठमाडौं । नेकपाका महासचिव नेत्रविक्रम चन्द विप्लवले राष्ट्रिय प्रजातन्त्र पार्टी (राप्रपा) अध्यक्ष कमल थापाबीच भेटवार्ता भएको छ । भेटवार्तामा सरकार र नेत्रविक्रम चन्द नेतृत्वको नेकपाबीच भएको तीन बुँदे सहमति कार्यान्वयनका विषयमा छलफल भएइको छ।

दुबै नेताबीचको भेटवार्तामा थापाले सरकारसंग भएको तीन बुँदे सहमति कार्यान्वयन हुनुपर्ने बताएका हुन्।

‘विप्लव’सहित उक्त पार्टीका नेता र राप्रपाका नेताबीच थापा निवास बुढानिलकण्ठमा भेटघाट भयो। दुवै पक्षका बीच समसामयिक विषयमा विचार विमर्श भयो,’ थापाले भनेका छन्, ‘विप्लव नेतृत्वको नेकपासँग सरकारले गरेको ३ बुँदे सहमति कार्यान्वयन हुनुपर्छ भन्ने राप्रपाको धारणा छ।’

पूर्ववर्ती सरकारले गत फागुन २० गते तत्कालीन अवस्थामा प्रतिबन्धित नेकपासँग प्रतिवन्ध फुकुवा, नेता कार्यकर्ता रिहाइ र मुद्दा खारेज गर्ने सहमति गरेको थियो। २१ गते फागुनमा विशेष समारोह गरेर सहमति सार्वजनिक गरिएको थियो। उक्त समारोहलाई तत्कालीन प्रधानमन्त्री केपी शर्मा ओली र नेकपा महासचिव विप्लवले सम्बोधन गरेका थिए।

तर चार महिना बितिसक्दा पनि सहमति अनुसार प्रतिबन्ध फुकुवाबाहेक बन्दी रिहाइ र मुद्दा फिर्ताबारे काम हुन सकेको छैन। नेकपाका १ सय भन्दा बढी नेताकार्यकर्ताहरु अहिलेपनि विभिन्‍न मुद्दामा कारागारमा छन्।

विप्लवले साउन ६ गते प्रधानमन्त्री शेरबहादुर देउवासँग भेट गरेर तीन बुँदे सहमति कार्यान्वयन गर्न आग्रह गरेका थिए। जवाफमा प्रधानमन्त्री देउवाले पूर्ववर्ती सरकारसँग भएको तीन बुँदे सहमति कार्यान्वयन गरिने आश्वासन दिएका थिए।